jab bhi mila wo TuT ke humse mila to hai

jab bhī milā vo TuuT ke ham se milā to hai

zāhir hai is ḳhulūs meñ kuchh mudda.ā to hai

us ko nayā mizāj nayā zehn chāhiye

bachcha zabāñ chalātā nahīñ sochtā to hai

kyā munsifī hai aap kī ḳhud dekh lījiye

insāf-e-shahr shahr-e-tamāshā banā to hai

dhabbe lahū ke ham ko batā deñge rāsta

shāyad kisī ke paañv meñ kāñTā chubhā to hai

manzil kī justujū meñ akele nahīñ haiñ ham

hamrāh to nahīñ hai tirā naqsh-e-pā to hai

go amn ho gayā hai vahāñ qatl-o-ḳhūñ ke ba.ad

darvāza sāzishoñ kā abhī tak khulā to hai

tahzīb ke libāde meñ sab be-libās haiñ

'anjum' tire badan pe darīda qabā to hai

jab bhi mila wo TuT ke hum se mila to hai

zahir hai is KHulus mein kuchh muddaa to hai

us ko naya mizaj naya zehn chahiye

bachcha zaban chalata nahin sochta to hai

kya munsifi hai aap ki KHud dekh lijiye

insaf-e-shahr shahr-e-tamasha bana to hai

dhabbe lahu ke hum ko bata denge rasta

shayad kisi ke panw mein kanTa chubha to hai

manzil ki justuju mein akele nahin hain hum

hamrah to nahin hai tera naqsh-e-pa to hai

go amn ho gaya hai wahan qatl-o-KHun ke baad

darwaza sazishon ka abhi tak khula to hai

tahzib ke libaade mein sab be-libas hain

'anjum' tere badan pe darida qaba to hai