جب بھی پیڑوں سے جاں نکلتی ہے

جب بھی پیڑوں سے جاں نکلتی ہے

زندگی بے اماں نکلتی ہے

ہم جسے واقعہ سمجھتے ہیں

وہ کوئی داستاں نکلتی ہے

محفل جان جاں کا مت پوچھو

حسرت دید واں نکلتی ہے

جب بھی موسم ہو سبز پتوں کا

حسرت بد گماں نکلتی ہے

صاحبان کرم کے صدقے سے

مستیٔ جسم و جاں نکلتی ہے

آہ اٹھتی ہے وادئ دل سے

پھر سوئے آسماں نکلتی ہے

جانب رفتگاں نہیں جاتی

زندگی پھر کہاں نکلتی ہے

جن کے ہونٹوں کو چپ سی لگ جائے

ان کی پوری زباں نکلتی ہے

یاد ماضی بھی دیدۂ تر سے

صورت کارواں نکلتی ہے