jab bhi peDon se jaan nikalti hai

jab bhī peḌoñ se jaañ nikaltī hai

zindagī be-amāñ nikaltī hai

ham jise vāqi.a samajhte haiñ

vo koī dāstāñ nikaltī hai

mahfil-e-jān-e-jāñ kā mat pūchho

hasrat-e-dīd vaañ nikaltī hai

jab bhī mausam ho sabz pattoñ kā

hasrat-e-bad-gumāñ nikaltī hai

sāhibān-e-karam ke sadqe se

mastī-e-jism-o-jāñ nikaltī hai

aah uThtī hai vādī-e-dil se

phir sū-e-asmāñ nikaltī hai

jānib-e-raftagāñ nahīñ jaatī

zindagī phir kahāñ nikaltī hai

jin ke hoñToñ ko chup sī lag jaa.e

un kī puurī zabāñ nikaltī hai

yād-e-māzī bhī dīda-e-tar se

sūrat-e-kārvāñ nikaltī hai

jab bhi peDon se jaan nikalti hai

zindagi be-aman nikalti hai

hum jise waqia samajhte hain

wo koi dastan nikalti hai

mahfil-e-jaan-e-jaan ka mat puchho

hasrat-e-did wan nikalti hai

jab bhi mausam ho sabz patton ka

hasrat-e-bad-guman nikalti hai

sahiban-e-karam ke sadqe se

masti-e-jism-o-jaan nikalti hai

aah uThti hai wadi-e-dil se

phir su-e-asman nikalti hai

jaanib-e-raftagan nahin jati

zindagi phir kahan nikalti hai

jin ke honTon ko chup si lag jae

un ki puri zaban nikalti hai

yaad-e-mazi bhi dida-e-tar se

surat-e-karwan nikalti hai