jab bhi zulfon ko tere ruKH pe bikharte dekha

jab bhī zulfoñ ko tire ruḳh pe bikharte dekhā

ho ke sharminda ghaTāoñ ko guzarte dekhā

dil se chup-chāp tujhe jab bhī guzarte dekhā

yād-e-māzī kā har ik naqsh ubharte dekhā

kitne ḳhvāboñ ko shab-o-roz bikharte dekhā

phir bhī ik pal na zamāne ko Thaharte dekhā

baat kuchh un kī javānī pe hī mauqūf nahīñ

chaḌhte dariyā ko bhī ik roz utarte dekhā

aa.ī vo raushnī hālāt ke bāzāroñ meñ

apne saa.e se bhī har shaḳhs ko Darte dekhā

koñpleñ phūTī haiñ shāḳhoñ pe na.e mausam kī

jis ghaḌī jaur-e-ḳhizāñ had se guzarte dekhā

bahr-e-ulfat meñ tasavvur hī kahāñ sāhil kā

Dūbne vaale ko hī paar utarte dekhā

rāhateñ maut haiñ insān ke haq meñ 'ārif'

dil kī fitrat ko masā.ib meñ sañvarte dekhā

jab bhi zulfon ko tere ruKH pe bikharte dekha

ho ke sharminda ghaTaon ko guzarte dekha

dil se chup-chap tujhe jab bhi guzarte dekha

yaad-e-mazi ka har ek naqsh ubharte dekha

kitne KHwabon ko shab-o-roz bikharte dekha

phir bhi ek pal na zamane ko Thaharte dekha

baat kuchh un ki jawani pe hi mauquf nahin

chaDhte dariya ko bhi ek roz utarte dekha

aai wo raushni haalat ke bazaron mein

apne sae se bhi har shaKHs ko Darte dekha

konplen phuTi hain shaKHon pe nae mausam ki

jis ghaDi jaur-e-KHizan had se guzarte dekha

bahr-e-ulfat mein tasawwur hi kahan sahil ka

Dubne wale ko hi par utarte dekha

rahaten maut hain insan ke haq mein 'arif'

dil ki fitrat ko masaib mein sanwarte dekha