jab chandniyan ghar ki dahliz pe chalti hain

jab chāñdniyāñ ghar kī dahlīz pe chaltī haiñ

āseb-zada rūheñ saḌkoñ pe Tahaltī haiñ

dar-asl vo nīñdeñ haiñ āġhosh meñ ashkoñ kī

palkoñ kī muñDeroñ se har shab jo phisaltī haiñ

mā'sūm umīdeñ haiñ hālāt kī gardish meñ

ghar meñ kisī muflis ke shahzādiyāñ paltī haiñ

ai kaash ki raushan hoñ fānūs umīdoñ ke

āñkhoñ ke kaToroñ meñ kuchh sham.eñ pighaltī haiñ

ḳhud se hī na ho jā.ūñ anjān kisī din maiñ

har roz tamannā.eñ poshāk badaltī haiñ

maslā gayā jis din se kaliyoñ ko yahāñ 'mīnā'

kuchh ḳhushbueñ sahrā se har raat nikaltī haiñ

jab chandniyan ghar ki dahliz pe chalti hain

aaseb-zada ruhen saDkon pe Tahalti hain

dar-asl wo ninden hain aaghosh mein ashkon ki

palkon ki munDeron se har shab jo phisalti hain

ma'sum umiden hain haalat ki gardish mein

ghar mein kisi muflis ke shahzadiyan palti hain

ai kash ki raushan hon fanus umidon ke

aankhon ke kaToron mein kuchh shamen pighalti hain

KHud se hi na ho jaun anjaan kisi din main

har roz tamannaen poshak badalti hain

masla gaya jis din se kaliyon ko yahan 'mina'

kuchh KHushbuen sahra se har raat nikalti hain