jab chhoD diya muD kar sahil ko nahin dekha

jab chhoḌ diyā muḌ kar sāhil ko nahīñ dekhā

raste ke musāfir ne manzil ko nahīñ dekhā

kyā hausla thā us kā kyā kar vo gayā logo

thā josh-e-junūñ hadd-e-fāsil ko nahīñ dekhā

vo laakh kare da.ave par ḳhaak mujhe samjhe

jis ne ki mire jazb-e-kāmil ko nahīñ dekhā

kyā ḳhuub hai hamdardī be-dard meharbāno

lāshoñ meñ ulajhte ho qātil ko nahīñ dekhā

tūfāñ se nipaTnā thā maujoñ se ulajhnā thā

ḳhatrāt meñ kashtī ne sāhil ko nahīñ dekhā

ehsās use hogā ḳhud jhūTī gavāhī kā

maqtal meñ abhī us ne bismil ko nahīñ dekhā

insāf kā mandir hai īmāñ kā ujālā bhī

kyoñ 'rāg' kisī ne bhī is dil ko nahīñ dekhā

jab chhoD diya muD kar sahil ko nahin dekha

raste ke musafir ne manzil ko nahin dekha

kya hausla tha us ka kya kar wo gaya logo

tha josh-e-junun hadd-e-fasil ko nahin dekha

wo lakh kare dawe par KHak mujhe samjhe

jis ne ki mere jazb-e-kaamil ko nahin dekha

kya KHub hai hamdardi be-dard meharbano

lashon mein ulajhte ho qatil ko nahin dekha

tufan se nipaTna tha maujon se ulajhna tha

KHatraat mein kashti ne sahil ko nahin dekha

ehsas use hoga KHud jhuTi gawahi ka

maqtal mein abhi us ne bismil ko nahin dekha

insaf ka mandir hai iman ka ujala bhi

kyon 'rag' kisi ne bhi is dil ko nahin dekha