jab dast-e-junun jaib-o-gareban se chala hai

jab dast-e-junūñ jaib-o-garebāñ se chalā hai

ruḳh maiñ ne rag-e-jāñ kī taraf moḌ diyā hai

ai dil ye koī khel nahīñ rāh-e-vafā hai

sau naqsh miTe haiñ to kahīñ ek banā hai

parvāna kuchh is taur se rah rah ke jalā hai

marne kī adāoñ meñ bhī jiine kī adā hai

ye abr ye barsāt ye bhīgī huī rāteñ

tauba ne kahāñ lā ke mujhe chhoḌ diyā hai

tum kyoñ mujhe ārām se marne nahīñ dete

ai chāragaro rahm karo vaqt-e-du'ā hai

mā'lūm to hotī hī nahīñ terī haqīqat

mahsūs ye hotā hai ki tū dekh rahā hai

'zāhid' hai burā aur na ham rind bure haiñ

manzil hai vahī ek magar raah judā hai

jis meñ ġham-e-jānāñ kī latāfat hai 'tabassum'

ham ne to ka.ī baar vahī zahr piyā hai

jab dast-e-junun jaib-o-gareban se chala hai

ruKH main ne rag-e-jaan ki taraf moD diya hai

ai dil ye koi khel nahin rah-e-wafa hai

sau naqsh miTe hain to kahin ek bana hai

parwana kuchh is taur se rah rah ke jala hai

marne ki adaon mein bhi jine ki ada hai

ye abr ye barsat ye bhigi hui raaten

tauba ne kahan la ke mujhe chhoD diya hai

tum kyon mujhe aaram se marne nahin dete

ai chaaragaro rahm karo waqt-e-du'a hai

ma'lum to hoti hi nahin teri haqiqat

mahsus ye hota hai ki tu dekh raha hai

'zahid' hai bura aur na hum rind bure hain

manzil hai wahi ek magar rah juda hai

jis mein gham-e-jaanan ki latafat hai 'tabassum'

hum ne to kai bar wahi zahr piya hai