jab dikhai de raha tha KHud-kushi ka rasta

jab dikhā.ī de rahā thā ḳhud-kushī kā rāstā

tab achānak hī milā ye shā.erī kā rāstā

dhīre dhīre ye hamārī bhī samajh meñ aa gayā

kis liye chuntā hai koī ḳhāmushī kā rāstā

kaash ham mahsūs karte dukh un āñkhoñ kā kabhī

dekhtī rahtī haiñ jo har pal kisī kā rāstā

chalte chalte ik na.e jangal meñ kaise aa ga.e

ham to samjhe the ki hai ye vāpsī kā rāstā

paañv se lipTā huā thā koī anhonī kā Dar

kitnā mushkil lag rahā thā do ghaḌī kā rāstā

raat vo ne.amat hai jo raushan hai apne nuur se

vo bhalā kab dekhtī hai raushnī kā rāstā

muḳhtalif ḳhushiyāñ haiñ sab kī muḳhtalif haiñ ranj-o-ġham

muḳhtalif hotā hai jaise har kisī kā rāstā

jab dikhai de raha tha KHud-kushi ka rasta

tab achanak hi mila ye shaeri ka rasta

dhire dhire ye hamari bhi samajh mein aa gaya

kis liye chunta hai koi KHamushi ka rasta

kash hum mahsus karte dukh un aankhon ka kabhi

dekhti rahti hain jo har pal kisi ka rasta

chalte chalte ek nae jangal mein kaise aa gae

hum to samjhe the ki hai ye wapsi ka rasta

panw se lipTa hua tha koi anhoni ka Dar

kitna mushkil lag raha tha do ghaDi ka rasta

raat wo neamat hai jo raushan hai apne nur se

wo bhala kab dekhti hai raushni ka rasta

muKHtalif KHushiyan hain sab ki muKHtalif hain ranj-o-gham

muKHtalif hota hai jaise har kisi ka rasta