jab dil mein tere wasl ka imkan nahin tha

jab dil meñ tire vasl kā imkān nahīñ thā

tab ishq mujhe bā.is-e-nuqsān nahīñ thā

sad-shukr mohabbat pe maiñ īmān le aaya

varna maiñ koī ḳhaas musalmān nahīñ thā

ik naqsh-e-qadam ne mujhe ye raah dikhā.ī

ye dasht yūñhī dosto āsān nahīñ thā

afsos ki tū ne bhī mirī baat na samjhī

dil tū to mire haal se anjān nahīñ thā

raas aa.ī thī zindān meñ mujh ko ye suhūlat

sau sher kahe maiñ ne pareshān nahīñ thā

lahje kī tamāzat se mirī aañkh khulī thī

vaise maiñ tirī baat pe hairān nahīñ thā

us shaḳhs kī hālat pe taras aatā hai 'rāshid'

jo mujh se bichhaḌ kar bhī pashemān nahīñ thā

jab dil mein tere wasl ka imkan nahin tha

tab ishq mujhe bais-e-nuqsan nahin tha

sad-shukr mohabbat pe main iman le aaya

warna main koi KHas musalman nahin tha

ek naqsh-e-qadam ne mujhe ye rah dikhai

ye dasht yunhi dosto aasan nahin tha

afsos ki tu ne bhi meri baat na samjhi

dil tu to mere haal se anjaan nahin tha

ras aai thi zindan mein mujh ko ye suhulat

sau sher kahe main ne pareshan nahin tha

lahje ki tamazat se meri aankh khuli thi

waise main teri baat pe hairan nahin tha

us shaKHs ki haalat pe taras aata hai 'rashid'

jo mujh se bichhaD kar bhi pasheman nahin tha