jab ghaTa jhum ke aati hai to pi leta hun

jab ghaTā jhuum ke aatī hai to pī letā huuñ

fasl-e-gul dhuum machātī hai to pī letā huuñ

chāñdnī meñ to kabhī chhāñv meñ tāroñ kī kabhī

raat hañs hañs ke bulātī hai to pī letā huuñ

yā kabhī terī judā.ī kī sulagtī huī shaam

ruuh meñ aag lagātī hai to pī letā huuñ

jab kabhī jashn manātā huuñ ġham-e-daurāñ kā

mai bhī us jashn meñ aatī hai to pī letā huuñ

kabhī hālāt kī talḳhī to kabhī fikr-e-jahāñ

ġham-zada dil ko dukhātī hai to pī letā huuñ

maiñ kabhī ḳhud nahīñ piitā ki ḳhudā shāhid hai

āsmāñ se utar aatī hai to pī letā huuñ

apnī har shaam to be-mai hī guzartī hai 'payām'

bazm-e-mai-ḳhāna pilātī hai to pī letā huuñ

jab ghaTa jhum ke aati hai to pi leta hun

fasl-e-gul dhum machati hai to pi leta hun

chandni mein to kabhi chhanw mein taron ki kabhi

raat hans hans ke bulati hai to pi leta hun

ya kabhi teri judai ki sulagti hui sham

ruh mein aag lagati hai to pi leta hun

jab kabhi jashn manata hun gham-e-dauran ka

mai bhi us jashn mein aati hai to pi leta hun

kabhi haalat ki talKHi to kabhi fikr-e-jahan

gham-zada dil ko dukhati hai to pi leta hun

main kabhi KHud nahin pita ki KHuda shahid hai

aasman se utar aati hai to pi leta hun

apni har sham to be-mai hi guzarti hai 'payam'

bazm-e-mai-KHana pilati hai to pi leta hun