jab gulistan na raha apna gulistan ki tarah

jab gulistāñ na rahā apnā gulistāñ kī tarah

āshiyāñ kyoñ na lage phir hameñ zindāñ kī tarah

vo nazar pher ke ab mujh se guzar jaate haiñ

jo samajhte the kabhī mujh ko rag-e-jāñ kī tarah

jitnā suljhāyā ise aur ulajhtī hī ga.ī

zindagī bhī hai mirī gesu-e-pechāñ kī tarah

koī bilqīs mire ghar meñ bhī mehmāñ hotī

merī taqdīr bhī hotī jo sulaimāñ kī tarah

dost samjhūñ maiñ kise aur kise dushman jānūñ

yuuñ to sab milte haiñ mujh se gul-e-ḳhandāñ kī tarah

mujh ko har moḌ pe mushkil se bachā letī hai

hai merī maañ kī duā mere nigahbāñ kī tarah

haiñ ba-zāhir to sabhī aadmī lekin ai 'farāz'

koī miltā nahīñ is daur meñ insāñ kī tarah

jab gulistan na raha apna gulistan ki tarah

aashiyan kyon na lage phir hamein zindan ki tarah

wo nazar pher ke ab mujh se guzar jate hain

jo samajhte the kabhi mujh ko rag-e-jaan ki tarah

jitna suljhaya ise aur ulajhti hi gai

zindagi bhi hai meri gesu-e-pechan ki tarah

koi bilqis mere ghar mein bhi mehman hoti

meri taqdir bhi hoti jo sulaiman ki tarah

dost samjhun main kise aur kise dushman jaanun

yun to sab milte hain mujh se gul-e-KHandan ki tarah

mujh ko har moD pe mushkil se bacha leti hai

hai meri man ki dua mere nigahban ki tarah

hain ba-zahir to sabhi aadmi lekin ai 'faraaz'

koi milta nahin is daur mein insan ki tarah