jab har nazar ho KHud hi tajalli-numa-e-gham

jab har nazar ho ḳhud hī tajallī-numā-e-ġham

phir aadmī chhupā.e to kaise chhupā.e ġham

us vaqt tak milī na mujhe lazzat-e-hayāt

jab tak rahā zamāne meñ nā-āshnā-e-ġham

merī nigāh-e-shauq hī ġham kā sabab nahīñ

un kī nigāh-e-nāz bhī hai rahnumā-e-ġham

saudā-e-ishq dard-e-mohabbat jafā-e-dost

ham ne ḳhushī ke vāste kyā kyā uThā.e ġham

shāyad ye hai karishma fareb-e-nashāt kā

ghabrā ke aa ga.ī hai laboñ par duā-e-ġham

'farhat' kī har hañsī meñ haiñ aañsū chhupe hue

us kī ḳhushī bhī oḌhe hue hai ridā-e-ġham

jab har nazar ho KHud hi tajalli-numa-e-gham

phir aadmi chhupae to kaise chhupae gham

us waqt tak mili na mujhe lazzat-e-hayat

jab tak raha zamane mein na-ashna-e-gham

meri nigah-e-shauq hi gham ka sabab nahin

un ki nigah-e-naz bhi hai rahnuma-e-gham

sauda-e-ishq dard-e-mohabbat jafa-e-dost

hum ne KHushi ke waste kya kya uThae gham

shayad ye hai karishma fareb-e-nashat ka

ghabra ke aa gai hai labon par dua-e-gham

'farhat' ki har hansi mein hain aansu chhupe hue

us ki KHushi bhi oDhe hue hai rida-e-gham