jab jaan pe lab-e-jaanan ki mahak ek barish manzar ho jae

jab jaañ pe lab-e-jānāñ kī mahak ik bārish manzar ho jaa.e

ham haath baḌhā.eñ aur is meñ mahtāb gul-e-tar ho jaa.e

kab dil kā laḌakpan jā.egā har vaqt yahī hai zid us kī

jo māñge usī pal mil jaa.e jo soche vahīñ par ho jaa.e

ik ālam-e-jāñ vo hotā hai taḳhsīs nahīñ jis meñ koī

is vaqt hamārī bāñhoñ meñ jo aa.e vo dilbar ho jaa.e

āshob-e-mohabbat kā aañsū rakhtā hai talavvun fitrat meñ

āñkhoñ meñ rahe to qatra hai Tapke to samundar ho jaa.e

jitnā bhī sameTeñ āñkhoñ meñ rahtā hī nahīñ kuchh yaad hameñ

yārab vo tilism-e-āriz-o-lab ik roz to azbar ho jaa.e

'jamshed' matā-e-husn jahāñ sab ahl-e-nazar kā hissa hai

jo chāhe qalandar ho jaa.e jo chāhe sikandar ho jaa.e

jab jaan pe lab-e-jaanan ki mahak ek barish manzar ho jae

hum hath baDhaen aur is mein mahtab gul-e-tar ho jae

kab dil ka laDakpan jaega har waqt yahi hai zid us ki

jo mange usi pal mil jae jo soche wahin par ho jae

ek aalam-e-jaan wo hota hai taKHsis nahin jis mein koi

is waqt hamari banhon mein jo aae wo dilbar ho jae

aashob-e-mohabbat ka aansu rakhta hai talawwun fitrat mein

aankhon mein rahe to qatra hai Tapke to samundar ho jae

jitna bhi sameTen aankhon mein rahta hi nahin kuchh yaad hamein

yarab wo tilism-e-ariz-o-lab ek roz to azbar ho jae

'jamshed' mata-e-husn jahan sab ahl-e-nazar ka hissa hai

jo chahe qalandar ho jae jo chahe sikandar ho jae