jab jab bhi humne ham-nashin dil ka kaha nahin kiya

jab jab bhī ham ne ham-nashīñ dil kā kahā nahīñ kiyā

aisā lagā hai zindagī kā haq adā nahīñ kiyā

kahne ko yuuñ to aap se shikve hazār the magar

ham ne kabhī ḳhilāf-e-dil koī gilā nahīñ kiyā

dil ke muāmlāt the dil meñ hī dafn kar liye

us bevafā se ham ne phir zikr-e-vafā nahīñ kiyā

kuchh to huā zarūr hai ham se agar ḳhafā hai vo

ham ne to jān-būjh kar us ko ḳhafā nahīñ kiyā

kār-e-jahāñ meñ ḳhūb-tar guzrī hai apnī zindagī

lekin ye dil pe bojh hai kār-e-ḳhudā nahīñ kiyā

tanhā.iyoñ meñ ḳhud se hī ham mahv-e-guftugū rahe

us ke sivā kisī se phir ahd-e-vafā nahīñ kiyā

aisā bhī daur-e-zīst thā shah-rag se vo qarīb thā

ab hai vo be-niyāz to ham ne pata nahīñ kiyā

ā.eñge lauT kar vo hī dil ko yaqīñ thā is liye

ham ne kisī ke vāste darvāza vā nahīñ kiyā

jab jab bhi hum ne ham-nashin dil ka kaha nahin kiya

aisa laga hai zindagi ka haq ada nahin kiya

kahne ko yun to aap se shikwe hazar the magar

hum ne kabhi KHilaf-e-dil koi gila nahin kiya

dil ke muamlat the dil mein hi dafn kar liye

us bewafa se hum ne phir zikr-e-wafa nahin kiya

kuchh to hua zarur hai hum se agar KHafa hai wo

hum ne to jaan-bujh kar us ko KHafa nahin kiya

kar-e-jahan mein KHub-tar guzri hai apni zindagi

lekin ye dil pe bojh hai kar-e-KHuda nahin kiya

tanhaiyon mein KHud se hi hum mahw-e-guftugu rahe

us ke siwa kisi se phir ahd-e-wafa nahin kiya

aisa bhi daur-e-zist tha shah-rag se wo qarib tha

ab hai wo be-niyaz to hum ne pata nahin kiya

aaenge lauT kar wo hi dil ko yaqin tha is liye

hum ne kisi ke waste darwaza wa nahin kiya