jab jhukane lagi duniya yahan mear-e-ishq

jab jhukāne lagī duniyā yahāñ me.ār-e-ishq

tab chale aa.e bachāne use bīmār-e-ishq

hañste hañste jo chale jaate haiñ ḳhud sū-e-dār

aise dīvānoñ se mahfūz hai pindār-e-ishq

chhā ga.e chāroñ taraf vahm-o-gumāñ ke bādal

terī mizhgāñ se gayā TuuT jo kohsār-e-ishq

saarī duniyā ko patā hai maiñ use chāhtī huuñ

maiñ nahīñ us se karūñgī kabhī iz.hār-e-ishq

har sadaf meñ nahīñ hotā hai guhar vaise bhī

sab ke dil ko nahīñ miltā hai ye āzār-e-ishq

phir se ābād nahīñ honā tujhe shahr-e-dil

phir se ta.amīr nahīñ hotā hai mismār-e-ishq

merī vahdat kā nazriya hai zamāne se judā

kin kī āvāz ko kahte haiñ ham asrār-e-ishq

daar to apne liye dair hai duniyā vāloñ

aur ye tauq to dar-asl hai zunnār-e-ishq

qāfiyoñ aur radīfoñ meñ to phañsne se rahī

aise thoḌe na ġhazal hogī giraftār-e-ishq

jab jhukane lagi duniya yahan mear-e-ishq

tab chale aae bachane use bimar-e-ishq

hanste hanste jo chale jate hain KHud su-e-dar

aise diwanon se mahfuz hai pindar-e-ishq

chha gae chaaron taraf wahm-o-guman ke baadal

teri mizhgan se gaya TuT jo kohsar-e-ishq

sari duniya ko pata hai main use chahti hun

main nahin us se karungi kabhi izhaar-e-ishq

har sadaf mein nahin hota hai guhar waise bhi

sab ke dil ko nahin milta hai ye aazar-e-ishq

phir se aabaad nahin hona tujhe shahr-e-dil

phir se tamir nahin hota hai mismar-e-ishq

meri wahdat ka nazriya hai zamane se juda

kin ki aawaz ko kahte hain hum asrar-e-ishq

dar to apne liye dair hai duniya walon

aur ye tauq to dar-asl hai zunnar-e-ishq

qafiyon aur radifon mein to phansne se rahi

aise thoDe na ghazal hogi giraftar-e-ishq