jab judai ka maza jata raha

jab judā.ī kā mazā jaatā rahā

āshnā.ī kā mazā jaatā rahā

lutf-e-vasl un kī hayā ne kho diyā

hāthā-pā.ī kā mazā jaatā rahā

jabr par karte haiñ vo tākīd-e-sabr

ab duhā.ī kā mazā jaatā rahā

qatra-e-mai āb-e-zamzam meñ nahīñ

is ThañDā.ī kā mazā jaatā rahā

sang-e-asvad ban gayā vo sang-e-dar

jab.ha-sā.ī kā mazā jaatā rahā

sīdhī sīdhī gāliyāñ diiñ aap ne

kaj-adā.ī kā mazā jaatā rahā

rotī hai maḳhlūq mere haal par

jag-hañsā.ī kā mazā jaatā rahā

kho diyā hai lan-tarānī ne tumheñ

ḳhud-numā.ī kā mazā jaatā rahā

kah rahā hai zaḳhm tere be-namak

muñh-bharā.ī kā mazā jaatā rahā

gul nahīñ suntā fuġhān-e-andalīb

ḳhush-navā.ī kā mazā jaatā rahā

vo dilāsā de rahe haiñ ġhair ko

dilrubā.ī kā mazā jaatā rahā

miT gayā naqsh-e-qadam us chaal par

rahnumā.ī kā mazā jaatā rahā

muñh lagī hai jab se 'rāsiḳh' duḳht-e-raz

pārsā.ī kā mazā jaatā rahā

jab judai ka maza jata raha

aashnai ka maza jata raha

lutf-e-wasl un ki haya ne kho diya

hatha-pai ka maza jata raha

jabr par karte hain wo takid-e-sabr

ab duhai ka maza jata raha

qatra-e-mai aab-e-zamzam mein nahin

is ThanDai ka maza jata raha

sang-e-aswad ban gaya wo sang-e-dar

jabha-sai ka maza jata raha

sidhi sidhi galiyan din aap ne

kaj-adai ka maza jata raha

roti hai maKHluq mere haal par

jag-hansai ka maza jata raha

kho diya hai lan-tarani ne tumhein

KHud-numai ka maza jata raha

kah raha hai zaKHm tere be-namak

munh-bharai ka maza jata raha

gul nahin sunta fughan-e-andalib

KHush-nawai ka maza jata raha

wo dilasa de rahe hain ghair ko

dilrubai ka maza jata raha

miT gaya naqsh-e-qadam us chaal par

rahnumai ka maza jata raha

munh lagi hai jab se 'rasiKH' duKHt-e-raz

parsai ka maza jata raha