jab kabhi aaya to zikr-e-mai-e-gulfam aaya

jab kabhī aayā to zikr-e-mai-e-gulfām aayā

kufr aayā tire rindoñ ko na islām aayā

phir kahāñ bhaag ke jā.eñge ye tere vahshī

gar tirī zulf ke saa.e meñ na ārām aayā

ham to barbād the barbād hī honā thā hameñ

kyoñ tirī chashm-e-'ināyat pe ye ilzām aayā

sī liye hoñTh ki andesha-e-rusvā.ī thā

phir bhī har saañs meñ chhup-chhup ke tirā naam aayā

baat to jab hai bane aaj koī merā harīf

'ishq meñ jaan gañvā dene kā hangām aayā

mai-kade se jo chale dār-o-rasan tak pahuñche

aaj ye pī ke bahaknā bhī bahut kaam aayā

jab kabhi aaya to zikr-e-mai-e-gulfam aaya

kufr aaya tere rindon ko na islam aaya

phir kahan bhag ke jaenge ye tere wahshi

gar teri zulf ke sae mein na aaram aaya

hum to barbaad the barbaad hi hona tha hamein

kyon teri chashm-e-'inayat pe ye ilzam aaya

si liye honTh ki andesha-e-ruswai tha

phir bhi har sans mein chhup-chhup ke tera nam aaya

baat to jab hai bane aaj koi mera harif

'ishq mein jaan ganwa dene ka hangam aaya

mai-kade se jo chale dar-o-rasan tak pahunche

aaj ye pi ke bahakna bhi bahut kaam aaya