jab kaha main hun tere ishq mein badnam ki tu

jab kahā maiñ huuñ tire ishq meñ badnām ki tū

hañs ke kis naaz se bolā but-e-ḳhud-kām ki tū

kaun sī raah chalūñ kufr mohabbat sach kah

kaam aa.egā vahāñ maz.hab-e-islām ki tū

dhoke de de ki mirā vaqt kaTā hai ki tirā

va.ade kar kar ke maiñ soyā huuñ sar-e-shām ki tū

parda uThne se mirā raaz khulā hai ki tirā

ghar se niklā hai tire saath mirā naam ki tū

kuchh to kah ai dil-e-betāb irāde kyā haiñ

nāma-bar jā.egā le kar mirā paiġhām ki tū

ḳhātma hijr kī shab kaun karegā merā

hasrat-e-vasl kā bigḌā huā anjām ki tū

sā.at-e-aish-e-do-roza tirī hājat kyā hai

ġham-e-jāved nikālegā mirā kaam ki tū

kaun piitā hai mohabbat kā piyāla pī le

mudda.ī legā mire haath se ik jaam ki tū

maiñ ne sochā ki nigāheñ unheñ DhūñDeñ ki ḳhayāl

nā-gahāñ bol uThī gardish-e-ayyām ki tū

tujh ko kyuuñ ranjish-e-bejā hai adū kā khaTkā

maiñ uThā.ūñgā mohabbat meñ ye ilzām ki tū

jab kaha main hun tere ishq mein badnam ki tu

hans ke kis naz se bola but-e-KHud-kaam ki tu

kaun si rah chalun kufr mohabbat sach kah

kaam aaega wahan mazhab-e-islam ki tu

dhoke de de ki mera waqt kaTa hai ki tera

wade kar kar ke main soya hun sar-e-sham ki tu

parda uThne se mera raaz khula hai ki tera

ghar se nikla hai tere sath mera nam ki tu

kuchh to kah ai dil-e-betab irade kya hain

nama-bar jaega le kar mera paigham ki tu

KHatma hijr ki shab kaun karega mera

hasrat-e-wasl ka bigDa hua anjam ki tu

saat-e-aish-e-do-roza teri hajat kya hai

gham-e-jawed nikalega mera kaam ki tu

kaun pita hai mohabbat ka piyala pi le

muddai lega mere hath se ek jam ki tu

main ne socha ki nigahen unhen DhunDen ki KHayal

na-gahan bol uThi gardish-e-ayyam ki tu

tujh ko kyun ranjish-e-beja hai adu ka khaTka

main uThaunga mohabbat mein ye ilzam ki tu