jab KHabar hi na koi mausam-e-gul ki aai

jab ḳhabar hī na koī mausam-e-gul kī aa.ī

kāġhzī phuul pe kuchh soch ke titlī aa.ī

sabz pattoñ ne bhī shāḳhoñ se baġhāvat kar dī

aaj is shahr meñ kis zor kī āñdhī aa.ī

ab ye bastī huī dīvāroñ kī kasrat kā shikār

ab yahāñ rahne meñ be-tarah ḳharābī aa.ī

qahqaha shab ne lagāyā hai baḌe tanz ke saath

sub.h jab apnī rihā.ī pe bhī rotī aa.ī

aañkh ik abr ke TukḌe ko taras jaatī thī

bārishoñ se jahāñ ab itnī tabāhī aa.ī

rāt-bhar sub.h kī ummīd pe zinda thā marīz

sub.h hote hī use āḳhirī hichkī aa.ī

mar gayā habs kī bastī meñ jūñhī koī 'nasīm'

nauha-ḳhvānī ko vahāñ taaza havā bhī aa.ī

jab KHabar hi na koi mausam-e-gul ki aai

kaghzi phul pe kuchh soch ke titli aai

sabz patton ne bhi shaKHon se baghawat kar di

aaj is shahr mein kis zor ki aandhi aai

ab ye basti hui diwaron ki kasrat ka shikar

ab yahan rahne mein be-tarah KHarabi aai

qahqaha shab ne lagaya hai baDe tanz ke sath

subh jab apni rihai pe bhi roti aai

aankh ek abr ke TukDe ko taras jati thi

barishon se jahan ab itni tabahi aai

raat-bhar subh ki ummid pe zinda tha mariz

subh hote hi use aaKHiri hichki aai

mar gaya habs ki basti mein junhi koi 'nasim'

nauha-KHwani ko wahan taza hawa bhi aai