jab KHilaf-e-maslahat jine ki naubat aai thi

jab ḳhilāf-e-maslahat jiine kī naubat aa.ī thī

Duub marte Duub marne meñ agar dānā.ī thī

maiñ to har mumkin use laatā rahā tere qarīb

kyā karūñ ai dil tirī taqdīr meñ tanhā.ī thī

ḳhauf kā ifrīt sāñseñ le rahā thā dasht meñ

raat ke chehre pe sannāTe kī dahshat chhā.ī thī

ek ye naubat ki vahshat DhūñDhtā phirtā huuñ maiñ

ek vo mausam ki gulshan kī huā sahrā.ī thī

āsmāñ se gir rahī thī shoḳh rañgoñ kī phuvār

merī āñkhoñ meñ tire dīdār kī ra.anā.ī thī

shab-gazīdoñ se hisāb-e-ġham chukāne ke liye

tum na aa.e the magar sub.h-e-qayāmat aa.ī thī

maiñ kidhar jaatā ki har jānib zabān-e-ḳhalq thī

maiñ kahāñ chhuptā ki mere khoj meñ rusvā.ī thī

dahr meñ mash.hūr thī 'shāhid' mirī be-chārgī

aur an-dekhe jahānoñ par mirī dārā.ī thī

jab KHilaf-e-maslahat jine ki naubat aai thi

Dub marte Dub marne mein agar danai thi

main to har mumkin use lata raha tere qarib

kya karun ai dil teri taqdir mein tanhai thi

KHauf ka ifrit sansen le raha tha dasht mein

raat ke chehre pe sannaTe ki dahshat chhai thi

ek ye naubat ki wahshat DhunDhta phirta hun main

ek wo mausam ki gulshan ki hua sahrai thi

aasman se gir rahi thi shoKH rangon ki phuwar

meri aankhon mein tere didar ki ranai thi

shab-gazidon se hisab-e-gham chukane ke liye

tum na aae the magar subh-e-qayamat aai thi

main kidhar jata ki har jaanib zaban-e-KHalq thi

main kahan chhupta ki mere khoj mein ruswai thi

dahr mein mashhur thi 'shahid' meri be-chaargi

aur an-dekhe jahanon par meri darai thi