jab khule muTThi to sab paDh len KHat-e-taqdir ko

jab khule muTThī to sab paḌh leñ ḳhat-e-taqdīr ko

jī meñ aatā hai miTā duuñ haath kī tahrīr ko

jism sannāTe ke aalam se guzartā hī nahīñ

be-hisī ne aur aur bojhal kar diyā zanjīr ko

bahtā dariyā hai ki ā.īna-garī kā silsila

dekhtā rahtā huuñ paanī meñ tirī tasvīr ko

sub.h-e-nau ne kaaT Daale shām-e-zulmat ke hisār

kis tarah roke koī kirnoñ kī jū-e-shīr ko

dhaḌkanoñ kī chaap ruk jaa.e to aa.e niiñd bhī

saath le kar phir rahā huuñ shor-e-dār-o-gīr ko

jab ma.ānī kā ujālā hī na ho alfāz meñ

kyuuñ kareñ raushnī suḳhan kī sham-e-be-tanvīr ko

dhund saa.e ḳhauf gahrī chup havā kī be-ruḳhī

kaise aalam meñ chalā huuñ dahr kī tasḳhīr ko

apnī peshānī pe shohrat kī lakīreñ khīñch le

apne siine se lagā le katba-e-tash.hīr ko

aks ā.īne se pahle thā to phir 'siddīqī' kyuuñ

ḳhvāb se pahle na dekhā ḳhvāb kī ta.abīr ko

jab khule muTThi to sab paDh len KHat-e-taqdir ko

ji mein aata hai miTa dun hath ki tahrir ko

jism sannaTe ke aalam se guzarta hi nahin

be-hisi ne aur aur bojhal kar diya zanjir ko

bahta dariya hai ki aaina-gari ka silsila

dekhta rahta hun pani mein teri taswir ko

subh-e-nau ne kaT Dale sham-e-zulmat ke hisar

kis tarah roke koi kirnon ki ju-e-shir ko

dhaDkanon ki chap ruk jae to aae nind bhi

sath le kar phir raha hun shor-e-dar-o-gir ko

jab maani ka ujala hi na ho alfaz mein

kyun karen raushni suKHan ki sham-e-be-tanwir ko

dhund sae KHauf gahri chup hawa ki be-ruKHi

kaise aalam mein chala hun dahr ki tasKHir ko

apni peshani pe shohrat ki lakiren khinch le

apne sine se laga le katba-e-tashhir ko

aks aaine se pahle tha to phir 'siddiqi' kyun

KHwab se pahle na dekha KHwab ki tabir ko