jab KHushi bhi KHushi nahin hoti

jab ḳhushī bhī ḳhushī nahīñ hotī

zindagī zindagī nahīñ hotī

tere jalve agar na shāmil hoñ

chāñdnī chāñdnī nahīñ hotī

kabhī hotā bhī hai nazar kā fareb

āgahī āgahī nahīñ hotī

jo na paidā ho shān-e-'abdiyyat

bandagī bandagī nahīñ hotī

sab karishme haiñ 'ishq ke varna

dilbarī dilbarī nahīñ hotī

jo na pākīza ho mazāq-e-hayāt

'āshiqī 'āshiqī nahīñ hotī

kabhī hotī hai parda-dārī-e-hosh

be-ḳhudī be-ḳhudī nahīñ hotī

ai ḳhushā tarz-e-iltifāt ki jab

barhamī barhamī nahīñ hotī

ho na 'irfān-e-nafs agar 'in'ām'

shā'irī shā'irī nahīñ hotī

jab KHushi bhi KHushi nahin hoti

zindagi zindagi nahin hoti

tere jalwe agar na shamil hon

chandni chandni nahin hoti

kabhi hota bhi hai nazar ka fareb

aagahi aagahi nahin hoti

jo na paida ho shan-e-'abdiyyat

bandagi bandagi nahin hoti

sab karishme hain 'ishq ke warna

dilbari dilbari nahin hoti

jo na pakiza ho mazaq-e-hayat

'ashiqi 'ashiqi nahin hoti

kabhi hoti hai parda-dari-e-hosh

be-KHudi be-KHudi nahin hoti

ai KHusha tarz-e-iltifat ki jab

barhami barhami nahin hoti

ho na 'irfan-e-nafs agar 'in'am'

sha'iri sha'iri nahin hoti