jab ki insan ki taqdir bigaD jati hai

jab ki insān kī taqdīr bigaḌ jaatī hai

jo banātā hai vo tadbīr bigaḌ jaatī hai

ḳhat likhūñ un ko to tahrīr bigaḌ jaatī hai

kuchh kahūñ muñh se to taqrīr bigaḌ jaatī hai

dekh kar mujh ko bal aatā hai tirī abrū meñ

saḳht jaañ vo huuñ ki shamshīr bigaḌ jaatī hai

sifat-e-ġhair mujhī se hai inhīñ bātoñ par

merī terī but-e-be-pīr bigaḌ jaatī hai

bad-mizājī kī ye sūrat hai ki maanī se bhī

khiñchte khiñchte tirī tasvīr bigaḌ jaatī hai

jab se us zulf-e-pareshāñ kā hai saudā sar meñ

mirī har ḳhvāb kī ta.abīr bigaḌ jaatī hai

mirī taqdīr hai barham to ba-vaqt-e-fariyād

nāla-e-āh kī tāsīr bigaḌ jaatī hai

haath rakhtā huuñ jo maiñ sar pe qasam khāne ko

aap kī zulf-e-girah-gīr bigaḌ jaatī hai

vasl kā kar ke vo iqrār mukar jaate haiñ

haa.e ban ban ke ye taqdīr bigaḌ jaatī hai

kyā huā vo jo na dāvat meñ bhī aa.e 'sābir'

ye to tadbīr hai taqdīr bigaḌ jaatī hai

jab ki insan ki taqdir bigaD jati hai

jo banata hai wo tadbir bigaD jati hai

KHat likhun un ko to tahrir bigaD jati hai

kuchh kahun munh se to taqrir bigaD jati hai

dekh kar mujh ko bal aata hai teri abru mein

saKHt jaan wo hun ki shamshir bigaD jati hai

sifat-e-ghair mujhi se hai inhin baaton par

meri teri but-e-be-pir bigaD jati hai

bad-mizaji ki ye surat hai ki mani se bhi

khinchte khinchte teri taswir bigaD jati hai

jab se us zulf-e-pareshan ka hai sauda sar mein

meri har KHwab ki tabir bigaD jati hai

meri taqdir hai barham to ba-waqt-e-fariyaad

nala-e-ah ki tasir bigaD jati hai

hath rakhta hun jo main sar pe qasam khane ko

aap ki zulf-e-girah-gir bigaD jati hai

wasl ka kar ke wo iqrar mukar jate hain

hae ban ban ke ye taqdir bigaD jati hai

kya hua wo jo na dawat mein bhi aae 'sabir'

ye to tadbir hai taqdir bigaD jati hai