jab ki sari kaenat uski nigahbani mein hai

jab ki saarī kā.enāt us kī nigahbānī meñ hai

dil azal hī se na jaane kaisī hairānī meñ hai

merī fitrat bhī to shāmil merī nādānī meñ hai

laġhzish-e-ādam jo pinhāñ ḳhūn-e-insānī meñ hai

jaane kis hangām meñ Daalī ga.ī buniyād-e-dil

dil jo ab tak mubtalā ranj-o-pareshānī meñ hai

duur kar detā hai bas ik pal meñ sab shikve-gile

ye karishma bhī kisī kī aañkh ke paanī meñ hai

kyā samajh pā.eñge ye ahl-e-ḳhirad is raaz ko

lutf dānā.ī meñ kab vo hai jo nādānī meñ hai

dil meñ aatā hai hisār-e-har-talab ko toḌ duuñ

aisī ḳhvāhish bhī tamannāoñ kī tuġhyānī meñ hai

ho ga.ī aadam se ye kaisī ḳhatā jis ke 'evaz

nasl-e-ādam aaj tak aisī pashemānī meñ hai

koī sūrat jab na ban paa.ī to ronā aa gayā

kuchh to taskīn-e-ġham-e-dil ashk-afshānī meñ hai

gar mile ḳhud meñ samo leñ saare insānoñ kā dard

is qadar vus'at hamārī tañg-dāmānī meñ hai

jab ki sari kaenat us ki nigahbani mein hai

dil azal hi se na jaane kaisi hairani mein hai

meri fitrat bhi to shamil meri nadani mein hai

laghzish-e-adam jo pinhan KHun-e-insani mein hai

jaane kis hangam mein Dali gai buniyaad-e-dil

dil jo ab tak mubtala ranj-o-pareshani mein hai

dur kar deta hai bas ek pal mein sab shikwe-gile

ye karishma bhi kisi ki aankh ke pani mein hai

kya samajh paenge ye ahl-e-KHirad is raaz ko

lutf danai mein kab wo hai jo nadani mein hai

dil mein aata hai hisar-e-har-talab ko toD dun

aisi KHwahish bhi tamannaon ki tughyani mein hai

ho gai aadam se ye kaisi KHata jis ke 'ewaz

nasl-e-adam aaj tak aisi pashemani mein hai

koi surat jab na ban pai to rona aa gaya

kuchh to taskin-e-gham-e-dil ashk-afshani mein hai

gar mile KHud mein samo len sare insanon ka dard

is qadar wus'at hamari tang-damani mein hai