jab kisi sahra se ho kar ek dariya jaega

jab kisī sahrā se ho kar ek dariyā jā.egā

tishnagī kā ḳhauf yaaro dil se miTtā jā.egā

din mayassar ham ko hogā kyā kabhī aisā bhī ik

har kisī insāñ ke muñh meñ jab nivālā jā.egā

kyā 'adāvat ruup bhī legī baġhāvat kā kabhī

kyā koī patthar yaqīnan phir uchhālā jā.egā

hādisa sach-much huā thā sāmne mere magar

kyā haqīqat ko kabhī kāġhaz pe likkhā jā.egā

dekhnā vo dauḌtā aa jā.egā merī taraf

jab idhar se us kī jānib ik ishāra jā.egā

ahl-e-dil se ho sakegā aaj milnā kyā ḳhabar

dekhnā hai haath se kyā ye bhī mauqa' jā.egā

us kināre kī tamannā tere dil meñ hai magar

tū samajh le duur tujh se ye kināra jā.egā

is jahāñ meñ haiñ musāfir kī tarah 'ānand' sab

falsafa jis ne ye samjhā sukh vahī pā jā.egā

jab kisi sahra se ho kar ek dariya jaega

tishnagi ka KHauf yaro dil se miTta jaega

din mayassar hum ko hoga kya kabhi aisa bhi ek

har kisi insan ke munh mein jab niwala jaega

kya 'adawat rup bhi legi baghawat ka kabhi

kya koi patthar yaqinan phir uchhaala jaega

hadisa sach-much hua tha samne mere magar

kya haqiqat ko kabhi kaghaz pe likkha jaega

dekhna wo dauDta aa jaega meri taraf

jab idhar se us ki jaanib ek ishaara jaega

ahl-e-dil se ho sakega aaj milna kya KHabar

dekhna hai hath se kya ye bhi mauqa' jaega

us kinare ki tamanna tere dil mein hai magar

tu samajh le dur tujh se ye kinara jaega

is jahan mein hain musafir ki tarah 'anand' sab

falsafa jis ne ye samjha sukh wahi pa jaega