jab koi lafz apni zaban se nikal gaya

jab koī lafz apnī zabāñ se nikal gayā

samjho ki jaise tiir kamāñ se nikal gayā

ik raushnī thī tair ke bāñhoñ meñ aa ga.ī

duniyā kā ranj vahm-o-gumāñ se nikal gayā

ab ‘ilm-o-āgahī kī karāmat to dekhiye

kal tak jo thā zamīñ pe zamāñ se nikal gayā

us ko na koī ġham na zamāne kī fikr hai

jo lālach-o-havas kī dukāñ se nikal gayā

parkhā qarīb se to 'ayāñ mujh pe ho gayā

phir yaar merā husn-e-bayāñ se nikal gayā

'bāsit' bichhaḌ ke aayā huuñ ik dost se abhī

ik shaḳhs aaj mere jahāñ se nikal gayā

jab koi lafz apni zaban se nikal gaya

samjho ki jaise tir kaman se nikal gaya

ek raushni thi tair ke banhon mein aa gai

duniya ka ranj wahm-o-guman se nikal gaya

ab ‘ilm-o-agahi ki karamat to dekhiye

kal tak jo tha zamin pe zaman se nikal gaya

us ko na koi gham na zamane ki fikr hai

jo lalach-o-hawas ki dukan se nikal gaya

parkha qarib se to 'ayan mujh pe ho gaya

phir yar mera husn-e-bayan se nikal gaya

'basit' bichhaD ke aaya hun ek dost se abhi

ek shaKHs aaj mere jahan se nikal gaya