jab koi shaKHs nigahon mein khaTak jata hai

jab koī shaḳhs nigāhoñ meñ khaTak jaatā hai

koī bhī jurm kare us pe hī shak jaatā hai

un nigāhoñ ko kabhī ġhaur se paḌhtā hī nahīñ

ġhaur karne se mirā dhyān bhaTak jaatā hai

itnī jaldī koī qurbat bhī baḌhātā hai kahīñ

terā dil hai ke dupaTTa hai sarak jaatā hai

roz ik aag dahaktī hai mirī āñkhoñ meñ

roz paanī koī chehre pe chhiḌak jaatā hai

itr ho phuul ho kesar ho hinā ho kyā ho

tum ko sochūñ to mirā kamra mahak jaatā hai

ishq un se mirā hogā bhī mukammal kaise

ain par hī merā iz.hār aTak jaatā hai

bas yahī soch ke ḳhāmosh rahā huuñ 'harshit'

dard hotā hai to chehre se jhalak jaatā hai

jab koi shaKHs nigahon mein khaTak jata hai

koi bhi jurm kare us pe hi shak jata hai

un nigahon ko kabhi ghaur se paDhta hi nahin

ghaur karne se mera dhyan bhaTak jata hai

itni jaldi koi qurbat bhi baDhata hai kahin

tera dil hai ke dupaTTa hai sarak jata hai

roz ek aag dahakti hai meri aankhon mein

roz pani koi chehre pe chhiDak jata hai

itr ho phul ho kesar ho hina ho kya ho

tum ko sochun to mera kamra mahak jata hai

ishq un se mera hoga bhi mukammal kaise

ain par hi mera izhaar aTak jata hai

bas yahi soch ke KHamosh raha hun 'harshit'

dard hota hai to chehre se jhalak jata hai