jab lab se mere harf-e-sadaqat nikal aae

jab lab se mire harf-e-sadāqat nikal aa.e

kuchh log liye sang-e-malāmat nikal aa.e

yā-rab koī aisī kahīñ sūrat nikal aa.e

nā-karda gunāhoñ kī bhī hasrat nikal aa.e

uTThe jo kahīñ sho.ala lahū de ke bujhā de

mumkin hai koī rāh-e-mohabbat nikal aa.e

ā.īne ko is shahr-e-havas meñ na liye phir

mushkil hai yahāñ se vo salāmat nikal aa.e

jis ḳhvāb ko ta.abīr ke laa.eq nahīñ samjhā

vo ḳhvāb agar apnā haqīqat nikal aa.e

kahne pe chalo toḌ leñ har shaḳhs se rishta

is meñ jo koī un kī siyāsat nikal aa.e

ḳhushbū hai kisī raaz kī siine meñ hamāre

mat chheḌ ki iz.hār-e-haqīqat nikal aa.e

har saañs pe rahtā hai jahāñ jabr kā pahra

maqtal se koī kaise salāmat nikal aa.e

bartā hai kuchh is rang se lafzoñ ko ġhazal meñ

mumkin hai ki is meñ bhī alāmat nikal aa.e

kar fikr ke ā.īne se har lamha na.ī baat

mumkin hai 'nazar' is tarah qāmat nikal aa.e

jab lab se mere harf-e-sadaqat nikal aae

kuchh log liye sang-e-malamat nikal aae

ya-rab koi aisi kahin surat nikal aae

na-karda gunahon ki bhi hasrat nikal aae

uTThe jo kahin shoala lahu de ke bujha de

mumkin hai koi rah-e-mohabbat nikal aae

aaine ko is shahr-e-hawas mein na liye phir

mushkil hai yahan se wo salamat nikal aae

jis KHwab ko tabir ke laeq nahin samjha

wo KHwab agar apna haqiqat nikal aae

kahne pe chalo toD len har shaKHs se rishta

is mein jo koi un ki siyasat nikal aae

KHushbu hai kisi raaz ki sine mein hamare

mat chheD ki izhaar-e-haqiqat nikal aae

har sans pe rahta hai jahan jabr ka pahra

maqtal se koi kaise salamat nikal aae

barta hai kuchh is rang se lafzon ko ghazal mein

mumkin hai ki is mein bhi alamat nikal aae

kar fikr ke aaine se har lamha nai baat

mumkin hai 'nazar' is tarah qamat nikal aae