jab lahu chashm ke kuzon se chhalakta paya

jab lahū chashm ke kūzoñ se chhalaktā paayā

tab kahīñ jā ke maiñ ehsās ko bahlā paayā

zulm ke saath hī maqtal meñ khaḌā thā sūraj

sabr ke mom ko lekin kahāñ pighlā paayā

alqamā bhuul ga.ī lazzat-e-sairābī-e-jāñ

us ne jab pyaas ko qurb-e-sar-e-dariyā paayā

chīḳhtī rah ga.ī sahrā meñ ḳhamoshī-e-‘avām

zulm ne nasb kiyā dasht meñ pahlā paayā

pyaas ke dasht meñ papḌā.e laboñ par us ne

jab zabāñ pherī to maqtal kā nazārā paayā

ashk ne rakh diye palkoñ kī salīboñ pe gale

tab mirī āñkhoñ ne kausar kā kinārā paayā

bas vahī gauhar-e-nāyāb haiñ baḳhshish ke liye

dīda-e-ḳhvāb se 'shārib' jinheñ chhalkā paayā

jab lahu chashm ke kuzon se chhalakta paya

tab kahin ja ke main ehsas ko bahla paya

zulm ke sath hi maqtal mein khaDa tha suraj

sabr ke mom ko lekin kahan pighla paya

alqama bhul gai lazzat-e-sairabi-e-jaan

us ne jab pyas ko qurb-e-sar-e-dariya paya

chiKHti rah gai sahra mein KHamoshi-e-‘awam

zulm ne nasb kiya dasht mein pahla paya

pyas ke dasht mein papDae labon par us ne

jab zaban pheri to maqtal ka nazara paya

ashk ne rakh diye palkon ki salibon pe gale

tab meri aankhon ne kausar ka kinara paya

bas wahi gauhar-e-nayab hain baKHshish ke liye

dida-e-KHwab se 'shaarib' jinhen chhalka paya