jab mayassar hai ki shaghl-e-baada-o-mina karen

jab mayassar hai ki shaġhl-e-bāda-o-mīnā kareñ

kyoñ ġham-e-imroz kyoñ andesha-e-fardā kareñ

qābil-e-tāzīr hoñ ham bhī agar shikva kareñ

un ko mashq-e-jaur karnā hai bahut achchhā kareñ

dil ye kahtā hai unheñ āThoñ pahar dekhā kareñ

aah ai ehsās-e-nām-o-nang tujh ko kyā kareñ

husn hai sargarm-e-jalva ishq hai be-tāb-e-shauq

ab batā.e koī arbāb-e-mohabbat kyā kareñ

bas ki dāman-gīr hai nāmūs-e-ulfat kā ḳhayāl

hāl-e-dil un ko sunā aane kī sūrat kyā kareñ

naama likh sakte nahīñ un ko bulā sakte nahīñ

yā-ḳhudā dard-e-mohabbat kā mudāvā kyā kareñ

al-madad ai marg rāz-e-ġham huā jaatā hai faash

dil ko thāmeñ dīda-e-tar ko sambhāleñ kyā kareñ

ho chalī hai iltifāt-andesh fitrat husn kī

vaqt hai ahl-e-mohabbat aur istiġhnā kareñ

iltifāt-e-sāqī-e-mai-ḳhāna hāsil hai 'rashīd'

aaj bhī kyoñ ehtimām-e-hasrat-e-duniyā kareñ

jab mayassar hai ki shaghl-e-baada-o-mina karen

kyon gham-e-imroz kyon andesha-e-farda karen

qabil-e-tazir hon hum bhi agar shikwa karen

un ko mashq-e-jaur karna hai bahut achchha karen

dil ye kahta hai unhen aaThon pahar dekha karen

aah ai ehsas-e-nam-o-nang tujh ko kya karen

husn hai sargarm-e-jalwa ishq hai be-tab-e-shauq

ab batae koi arbab-e-mohabbat kya karen

bas ki daman-gir hai namus-e-ulfat ka KHayal

haal-e-dil un ko suna aane ki surat kya karen

nama likh sakte nahin un ko bula sakte nahin

ya-KHuda dard-e-mohabbat ka mudawa kya karen

al-madad ai marg raaz-e-gham hua jata hai fash

dil ko thamen dida-e-tar ko sambhaalen kya karen

ho chali hai iltifat-andesh fitrat husn ki

waqt hai ahl-e-mohabbat aur istighna karen

iltifat-e-saqi-e-mai-KHana hasil hai 'rashid'

aaj bhi kyon ehtimam-e-hasrat-e-duniya karen