jab meri man ki duaon ka asar bolta hai

jab mirī maañ kī du'āoñ kā asar boltā hai

tab kahīñ jā ke mirā dast-e-hunar boltā hai

muddatoñ baa'd bhī hoñToñ pe tilāvat hai vahī

aaj bhī maqtal-e-karbal meñ vo sar boltā hai

ḳhuuñ kī har buuñd se terī hī sadā aatī hai

mujh meñ bahte hue dariyā kā bhañvar boltā hai

koī aahaT hai na dastak na havā kā jhoñkā

phir bhī vīrān havelī kā ye dar boltā hai

in parindoñ ne sikhā dī hai use apnī zabāñ

in parindoñ kī tarah ab ye shajar boltā hai

mujh ko thakne hī nahīñ detā junūn-e-manzil

thak ke baiThūñ to mirā shauq-e-safar boltā hai

peḌ ke saath lipaT aur zarā kaan lagā

yuuñ lagegā ki baḌā chup hai magar boltā hai

merī tā.īd yahāñ kaun karegā 'ansar'

shahr kā shahr tire zer-e-asar boltā hai

jab meri man ki du'aon ka asar bolta hai

tab kahin ja ke mera dast-e-hunar bolta hai

muddaton ba'd bhi honTon pe tilawat hai wahi

aaj bhi maqtal-e-karbal mein wo sar bolta hai

KHun ki har bund se teri hi sada aati hai

mujh mein bahte hue dariya ka bhanwar bolta hai

koi aahaT hai na dastak na hawa ka jhonka

phir bhi viran haweli ka ye dar bolta hai

in parindon ne sikha di hai use apni zaban

in parindon ki tarah ab ye shajar bolta hai

mujh ko thakne hi nahin deta junun-e-manzil

thak ke baiThun to mera shauq-e-safar bolta hai

peD ke sath lipaT aur zara kan laga

yun lagega ki baDa chup hai magar bolta hai

meri taid yahan kaun karega 'ansar'

shahr ka shahr tere zer-e-asar bolta hai