jab mohabbat ka kisi shai pe asar ho jae

jab mohabbat kā kisī shai pe asar ho jaa.e

ek vīrān makāñ boltā ghar ho jaa.e

maiñ huuñ sūraj-mukhī tū merā hai dilbar sūraj

tū jidhar jaa.e mirā ruḳh bhī udhar ho jaa.e

ranj-o-ġham aish-o-ḳhushī jis ke liye ek hī hoñ

umr us shaḳhs kī shāhoñ sī basar ho jaa.e

jo bhī dukh dard musībat kā piye vish hañs kar

kyuuñ na suqrāt kī sūrat vo amar ho jaa.e

lauT aao jo kabhī raam kī sūrat tum to

man kā sunsān avadh diip nagar ho jaa.e

khā ke patthar bhī jo muskān bikhere har-sū

bāġh-e-ālam kā vo phaldār shajar ho jaa.e

ham ne jaanā hai yahī aa ke jahāñ meñ 'darvesh'

honā chāhe jo na hargiz vo bashar ho jaa.e

jab mohabbat ka kisi shai pe asar ho jae

ek viran makan bolta ghar ho jae

main hun suraj-mukhi tu mera hai dilbar suraj

tu jidhar jae mera ruKH bhi udhar ho jae

ranj-o-gham aish-o-KHushi jis ke liye ek hi hon

umr us shaKHs ki shahon si basar ho jae

jo bhi dukh dard musibat ka piye wish hans kar

kyun na suqraat ki surat wo amar ho jae

lauT aao jo kabhi ram ki surat tum to

man ka sunsan awadh dip nagar ho jae

kha ke patthar bhi jo muskan bikhere har-su

bagh-e-alam ka wo phaldar shajar ho jae

hum ne jaana hai yahi aa ke jahan mein 'darwesh'

hona chahe jo na hargiz wo bashar ho jae