jab na gumbad na sada raqs mein ho

jab na gumbad na sadā raqs meñ ho

kyā na ho raqs meñ kyā raqs meñ ho

aks ho apnī dhamāleñ oḌhe

aa.ina apnī jagah raqs meñ ho

tāliyāñ piiT rahe hoñ patte

aur peḌoñ pe havā raqs meñ ho

Dūbne vaale hoñ sāhil sāhil

mauj-dar-mauj ghaḌā raqs meñ ho

rāt-bhar āyateñ gaate rahiye

kyā ḳhabar koī duā raqs meñ ho

kyā ḳhabar raqs meñ ho qibla-e-jāñ

dam-ba-dam sajda adā raqs meñ ho

ek darvesh paḌhe jaa.e ġhazal

ek darvesh sadā raqs meñ ho

raqs meñ lamha vo kab aatā hai

paañv sākit hoñ fazā raqs meñ ho

aag sī shai ho koī rag rag meñ

ek ik añg mirā raqs meñ ho

saayā kab TuuT ke yuuñ nāchtā thā

aaj mumkin hai diyā raqs meñ ho

TuuT bhī jā.ūñ patā bhī na chale

kam se kam itnā nasha raqs meñ ho

jab na gumbad na sada raqs mein ho

kya na ho raqs mein kya raqs mein ho

aks ho apni dhamalen oDhe

aaina apni jagah raqs mein ho

taliyan piT rahe hon patte

aur peDon pe hawa raqs mein ho

Dubne wale hon sahil sahil

mauj-dar-mauj ghaDa raqs mein ho

raat-bhar aayaten gate rahiye

kya KHabar koi dua raqs mein ho

kya KHabar raqs mein ho qibla-e-jaan

dam-ba-dam sajda ada raqs mein ho

ek darwesh paDhe jae ghazal

ek darwesh sada raqs mein ho

raqs mein lamha wo kab aata hai

panw sakit hon faza raqs mein ho

aag si shai ho koi rag rag mein

ek ek ang mera raqs mein ho

saya kab TuT ke yun nachta tha

aaj mumkin hai diya raqs mein ho

TuT bhi jaun pata bhi na chale

kam se kam itna nasha raqs mein ho