jab naz-e-ishq husn ke qabil nahin raha

jab nāz-e-ishq husn ke qābil nahīñ rahā

phir vo kuchh aur hī hai mirā dil nahīñ rahā

kahtī hai dil ke haal pe ghabrā ke be-ḳhudī

ye aap meñ bhī aane ke qābil nahīñ rahā

ik jalva pesh pesh hai aur baḌh rahe haiñ ham

ab kuchh ḳhayāl-e-dūrī-e-manzil nahīñ rahā

duniyā yahī hai shak hai to is ko miTā ke dekh

phir kuchh nahīñ jahān meñ jab dil nahīñ rahā

puurī jazā milegī isī dil ko hashr meñ

jis ko ḳhayāl-e-shikva-e-qātil nahīñ rahā

tamkīñ ġhazab hai sāqī-e-daur-e-alast meñ

shāyad ḳhayāl-e-garmī-e-mahfil nahīñ rahā

duniyā se pūchh dekh koī zarra dahr kā

taz.īn-e-kā.enāt se ġhāfil nahīñ rahā

zīnat pe kā.enāt kī jaane lagī nazar

ab maiñ tire ḳhayāl ke qābil nahīñ rahā

bas kar ujaḌ chukī haiñ umangoñ kī bastiyāñ

duniyā meñ shaad aaj koī dil nahīñ rahā

afsurdagī kī jaan hai āzurdagī kī ruuh

jo valvaloñ kī jaan thā vo dil nahīñ rahā

hai kal kī baat thā yahī duniyā-e-husn-o-ishq

vīrāna-e-malāl hai ab dil nahīñ rahā

'beḳhud' kisī ke nāz-e-duī-soz kī qasam

kaisī nazar ḳhayāl bhī haa.il nahīñ rahā

jab naz-e-ishq husn ke qabil nahin raha

phir wo kuchh aur hi hai mera dil nahin raha

kahti hai dil ke haal pe ghabra ke be-KHudi

ye aap mein bhi aane ke qabil nahin raha

ek jalwa pesh pesh hai aur baDh rahe hain hum

ab kuchh KHayal-e-duri-e-manzil nahin raha

duniya yahi hai shak hai to is ko miTa ke dekh

phir kuchh nahin jahan mein jab dil nahin raha

puri jaza milegi isi dil ko hashr mein

jis ko KHayal-e-shikwa-e-qatil nahin raha

tamkin ghazab hai saqi-e-daur-e-alast mein

shayad KHayal-e-garmi-e-mahfil nahin raha

duniya se puchh dekh koi zarra dahr ka

tazin-e-kaenat se ghafil nahin raha

zinat pe kaenat ki jaane lagi nazar

ab main tere KHayal ke qabil nahin raha

bas kar ujaD chuki hain umangon ki bastiyan

duniya mein shad aaj koi dil nahin raha

afsurdagi ki jaan hai aazurdagi ki ruh

jo walwalon ki jaan tha wo dil nahin raha

hai kal ki baat tha yahi duniya-e-husn-o-ishq

virana-e-malal hai ab dil nahin raha

'beKHud' kisi ke naz-e-dui-soz ki qasam

kaisi nazar KHayal bhi hail nahin raha