jab nigah-e-talab moatabar ho gai

jab nigāh-e-talab mo'atabar ho ga.ī

manzil-e-shauq dushvār-tar ho ga.ī

sā.at-e-ġham bhī kyā muḳhtasar ho ga.ī

terī yaad aa.ī thī ki sahar ho ga.ī

har haqīqat ḳhud apnī ḳhabar ho ga.ī

bid.at-e-rañg sarf-e-nazar ho ga.ī

raat mahfil meñ vo be-naqāb aa.e the

aur ham ne ye samjhā sahar ho ga.ī

apne pindār kī laash Dhote rahe

zindagī apnī is meñ basar ho ga.ī

aa.ine se palaTtī rahī har kiran

har nazar apnī hī parda-dar ho ga.ī

koī ilzām jalvoñ pe aayā nahīñ

bebasī aañkh kī mushtahar ho ga.ī

vo jo aa.e to sailāb-e-nūr aa gayā

raushnī ḳhud hī sadd-e-nazar ho ga.ī

chārasāzī na kī haif nazroñ hī ne

ham ne samjhā du'ā be-asar ho ga.ī

haa.e phir terī bātoñ meñ dil aa gayā

phir fusūñ-sāz terī nazar ho ga.ī

apne ijz-e-nazar kā bharam khul gayā

be-hijābī tirī dīda-var ho ga.ī

'tarzī' qadmoñ ke badle jabīneñ mileñ

nā-rasī qismat-e-sa.ag-e-dar ho ga.ī

jab nigah-e-talab mo'atabar ho gai

manzil-e-shauq dushwar-tar ho gai

saat-e-gham bhi kya muKHtasar ho gai

teri yaad aai thi ki sahar ho gai

har haqiqat KHud apni KHabar ho gai

bidat-e-rang sarf-e-nazar ho gai

raat mahfil mein wo be-naqab aae the

aur hum ne ye samjha sahar ho gai

apne pindar ki lash Dhote rahe

zindagi apni is mein basar ho gai

aaine se palaTti rahi har kiran

har nazar apni hi parda-dar ho gai

koi ilzam jalwon pe aaya nahin

bebasi aankh ki mushtahar ho gai

wo jo aae to sailab-e-nur aa gaya

raushni KHud hi sadd-e-nazar ho gai

chaarasazi na ki haif nazron hi ne

hum ne samjha du'a be-asar ho gai

hae phir teri baaton mein dil aa gaya

phir fusun-saz teri nazar ho gai

apne ijz-e-nazar ka bharam khul gaya

be-hijabi teri dida-war ho gai

'tarzi' qadmon ke badle jabinen milen

na-rasi qismat-e-sag-e-dar ho gai