jab par-e-parwaz mera aasman mein aa gaya

jab par-e-parvāz merā āsmāñ meñ aa gayā

ik parinda bhī saf-e-sayyārgāñ meñ aa gayā

maiñ pas-e-parda koī gumnām sā kirdār thā

zikr merā kaise terī dāstāñ meñ aa gayā

ye zarūrī to nahīñ hijrat parinde hī kareñ

dhuup jis ko bhī lagī vo sā.ebāñ meñ aa gayā

āsmāñ par ik diye kī lau uchhālī thī faqat

lauT kar saarā ujālā ḳhāk-dāñ meñ aa gayā

jab mirī umr-e-ravāñ uñglī pakaḌ kar chal paḌī

dekh maiñ phir se tire vahm-o-gumāñ meñ aa gayā

maiñ ne chakkhī thī kisī ke narm lahje kī miThās

kyā batā.ūñ zā.iqa kaisā zabāñ meñ aa gayā

ek sahrā chal paḌā 'ehsān' mere saath kyā

vo bhī mere halqa-e-āvārgāñ meñ aa gayā

jab par-e-parwaz mera aasman mein aa gaya

ek parinda bhi saf-e-sayyargan mein aa gaya

main pas-e-parda koi gumnam sa kirdar tha

zikr mera kaise teri dastan mein aa gaya

ye zaruri to nahin hijrat parinde hi karen

dhup jis ko bhi lagi wo saeban mein aa gaya

aasman par ek diye ki lau uchhaali thi faqat

lauT kar sara ujala KHak-dan mein aa gaya

jab meri umr-e-rawan ungli pakaD kar chal paDi

dekh main phir se tere wahm-o-guman mein aa gaya

main ne chakkhi thi kisi ke narm lahje ki miThas

kya bataun zaiqa kaisa zaban mein aa gaya

ek sahra chal paDa 'ehsan' mere sath kya

wo bhi mere halqa-e-awargan mein aa gaya