jab phul chubhe dil mein tab Khaar ko kya kahiye

jab phuul chubhe dil meñ tab ḳhaar ko kyā kahiye

marham ne kiyā zaḳhmī talvār ko kyā kahiye

hamdard nigāhoñ ne dil aur bhī taḌpāyā

darmāñ ne ġhazab Dhāyā āzār ko kyā kahiye

iz.hār-e-tamannā par mub.ham sī nigāhoñ ke

iqrār ko kyā kahiye inkār ko kyā kahiye

aalam jo tirā dekhā nāseh bhī huā shaidā

dīvāna to dīvāna hushiyār ko kyā kahiye

tadbīr kā hai dushman taqdīr kā barham-zan

is dard-e-mohabbat ke āzār ko kyā kahiye

is fitna-e-daurāñ kī jo baat hai aafat hai

raftār ko kyā kahiye guftār ko kyā kahiye

un shoḳh nigāhoñ kā har vaar qayāmat hai

is vaar ko kyā kahiye us vaar ko kyā kahiye

ghanghor ghaTāoñ kā unvān-e-karam tauba

zāhid bhī bahaktā hai mai-ḳhvār ko kyā kahiye

maḳhmūr nigāhoñ kī allāh re mai-rezī

hushiyār bhī hai be-ḳhud sarshār ko kyā kahiye

āzār-e-mohabbat kī duniyā hai ajab duniyā

achchhā bhī nahīñ achchhā bīmār ko kyā kahiye

dil chhīn ke ġham baḳhshā sar le ke diyā saudā

is husn-o-mohabbat kī sarkār ko kyā kahiye

har rāz-e-nihāñ āḳhir ġhammāz se kah Daalā

ḳhāmosh nigāhoñ kī guftār ko kyā kahiye

tā-mai-kada rindoñ meñ jo dast-ba-dast aa.e

us jubbe ko kyā kahiye dastār ko kyā kahiye

duniyā kī nazar meñ tum ma.asūm sahī lekin

paimān-e-mohabbat se inkār ko kyā kahiye

hai us kī javānī par ḳhud vajd javānī ko

mai aap bahaktī hai mai-ḳhvār ko kyā kahiye

un ishva-tarāzoñ kā un mast-ḳhirāmoñ kā

ruknā bhī qayāmat hai raftār ko kyā kahiye

tauba kā bharam rakhnā īmāñ thā 'sarosh' apnā

saaqī kī nigāhoñ ke isrār ko kyā kahiye

jab phul chubhe dil mein tab KHar ko kya kahiye

marham ne kiya zaKHmi talwar ko kya kahiye

hamdard nigahon ne dil aur bhi taDpaya

darman ne ghazab Dhaya aazar ko kya kahiye

izhaar-e-tamanna par mubham si nigahon ke

iqrar ko kya kahiye inkar ko kya kahiye

aalam jo tera dekha naseh bhi hua shaida

diwana to diwana hushiyar ko kya kahiye

tadbir ka hai dushman taqdir ka barham-zan

is dard-e-mohabbat ke aazar ko kya kahiye

is fitna-e-dauran ki jo baat hai aafat hai

raftar ko kya kahiye guftar ko kya kahiye

un shoKH nigahon ka har war qayamat hai

is war ko kya kahiye us war ko kya kahiye

ghanghor ghaTaon ka unwan-e-karam tauba

zahid bhi bahakta hai mai-KHwar ko kya kahiye

maKHmur nigahon ki allah re mai-rezi

hushiyar bhi hai be-KHud sarshaar ko kya kahiye

aazar-e-mohabbat ki duniya hai ajab duniya

achchha bhi nahin achchha bimar ko kya kahiye

dil chhin ke gham baKHsha sar le ke diya sauda

is husn-o-mohabbat ki sarkar ko kya kahiye

har raaz-e-nihan aaKHir ghammaz se kah Dala

KHamosh nigahon ki guftar ko kya kahiye

ta-mai-kada rindon mein jo dast-ba-dast aae

us jubbe ko kya kahiye dastar ko kya kahiye

duniya ki nazar mein tum masum sahi lekin

paiman-e-mohabbat se inkar ko kya kahiye

hai us ki jawani par KHud wajd jawani ko

mai aap bahakti hai mai-KHwar ko kya kahiye

un ishwa-taraazon ka un mast-KHiramon ka

rukna bhi qayamat hai raftar ko kya kahiye

tauba ka bharam rakhna iman tha 'sarosh' apna

saqi ki nigahon ke israr ko kya kahiye