jab samne ki baat hi uljhi hui mile

jab sāmne kī baat hī uljhī huī mile

phir duur dekhtī huī āñkhoñ se bhī ho kyā

hāthoñ se chhū ke pahle ujālā kareñ talāsh

jab raushnī na ho to nigāhoñ se bhī ho kyā

hairat-zada se rahte haiñ apne madār par

us ke alāva chāñd sitāroñ se bhī ho kyā

pāgal na ho to aur ye paanī bhī kyā kare

vahshī na hoñ to aur havāoñ se bhī ho kyā

jab dekhne lage koī chīzoñ ke us taraf

āñkheñ bhī terī kyā kareñ bātoñ se bhī ho kyā

yuuñ to mujhe bhī shikva hai un se magar 'malāl'

hālāt is tarah ke haiñ logoñ se bhī ho kyā

jab samne ki baat hi uljhi hui mile

phir dur dekhti hui aankhon se bhi ho kya

hathon se chhu ke pahle ujala karen talash

jab raushni na ho to nigahon se bhi ho kya

hairat-zada se rahte hain apne madar par

us ke alawa chand sitaron se bhi ho kya

pagal na ho to aur ye pani bhi kya kare

wahshi na hon to aur hawaon se bhi ho kya

jab dekhne lage koi chizon ke us taraf

aankhen bhi teri kya karen baaton se bhi ho kya

yun to mujhe bhi shikwa hai un se magar 'malal'

haalat is tarah ke hain logon se bhi ho kya