jab se aankhon mein koi KHwab-e-hasin rakkha hai

jab se āñkhoñ meñ koī ḳhvāb-e-hasīñ rakkhā hai

us kī ta.abīr kā tohfa bhī kahīñ rakkhā hai

jis kī fitrat hai sadā logoñ ko dhokā denā

kyoñ use aap ne phir apnā amiiñ rakkhā hai

sab ko detā huuñ mohabbat kā hasīñ guldasta

jazba nafrat kā kabhī dil meñ nahīñ rakkhā hai

garche haivāniyat aane lagī us meñ phir se

maiñ ne insān kī azmat pe yaqīñ rakkhā hai

justujū kartā huuñ us kī maiñ baḌī muddat se

vo ḳhazāna jo kahīñ zer-e-zamīñ rakkhā hai

shahr-e-jāñ meñ hai ujālā isī ḳhātir ai 'samar'

dil ke ḳhāne meñ unheñ maiñ ne makīñ rakkhā hai

jab se aankhon mein koi KHwab-e-hasin rakkha hai

us ki tabir ka tohfa bhi kahin rakkha hai

jis ki fitrat hai sada logon ko dhoka dena

kyon use aap ne phir apna amin rakkha hai

sab ko deta hun mohabbat ka hasin guldasta

jazba nafrat ka kabhi dil mein nahin rakkha hai

garche haiwaniyat aane lagi us mein phir se

main ne insan ki azmat pe yaqin rakkha hai

justuju karta hun us ki main baDi muddat se

wo KHazana jo kahin zer-e-zamin rakkha hai

shahr-e-jaan mein hai ujala isi KHatir ai 'samar'

dil ke KHane mein unhen main ne makin rakkha hai