jab se aankhon mein tere rang bhare hain darwesh

jab se āñkhoñ meñ tire rang bhare haiñ darvesh

ham ko sūkhe hue jangal bhī hare haiñ darvesh

aap ko chashm-e-tasavvur bhī nahīñ chhū saktī

aap zehnoñ ke darīchoñ se pare haiñ darvesh

terī ruḳhsat kā taġhāful to bahut baa'd kī baat

terī aamad se hī ham be-ḳhabare haiñ darvesh

zabt par log qasīde pe qasīda-go haiñ

aur aañsū haiñ ki palkoñ pe dhare haiñ darvesh

is liye aur bhī maġhrūr-e-zamāna ham haiñ

jitne kashkol meñ sikke haiñ khare haiñ darvesh

ik terī rāh-e-rifāqat se zarā paañv haTe

ḳhush-nasībān-e-safar dar-badare haiñ darvesh

dekh hāthoñ meñ laraztī huī talvāreñ dekh

ye sipāhī tirī aahaT se Dare haiñ darvesh

ik zarā ḳhair hī pūchhī thī safar kī maiñ ne

aap to lagtā hai baiThe hī bhare haiñ darvesh

jab se aankhon mein tere rang bhare hain darwesh

hum ko sukhe hue jangal bhi hare hain darwesh

aap ko chashm-e-tasawwur bhi nahin chhu sakti

aap zehnon ke darichon se pare hain darwesh

teri ruKHsat ka taghaful to bahut ba'd ki baat

teri aamad se hi hum be-KHabare hain darwesh

zabt par log qaside pe qasida-go hain

aur aansu hain ki palkon pe dhare hain darwesh

is liye aur bhi maghrur-e-zamana hum hain

jitne kashkol mein sikke hain khare hain darwesh

ek teri rah-e-rifaqat se zara panw haTe

KHush-nasiban-e-safar dar-badare hain darwesh

dekh hathon mein larazti hui talwaren dekh

ye sipahi teri aahaT se Dare hain darwesh

ek zara KHair hi puchhi thi safar ki main ne

aap to lagta hai baiThe hi bhare hain darwesh