jab se alfaz ke jangal mein ghira hai koi

jab se alfāz ke jañgal meñ ghirā hai koī

pūchhtā phirtā hai merī bhī sadā hai koī

raah kī dhuul meñ Duubā huā aa pahuñchegā

apne maazī kā pata lene gayā hai koī

raat ke saa.e meñ ik ujḌe hue āñgan meñ

be-sadā ThūñTH ke mānind khaḌā hai koī

jab bhī ghabrā ke tujhe detā huuñ ik aadh sadā

log kahte haiñ ki is ghar meñ balā hai koī

maiñ vo chiTThī huuñ miTā jaatā hai jis kā har harf

paḌh ke ik baar mujhe bhuul gayā hai koī

āsmāñ raat daraḳhtoñ ke qarīb aayā thā

pūchhtā phirtā thā kyā un meñ chhupā hai koī

tum yūñhī vaqt gañvāne pe tule ho 'ābid'

kabhī paanī pe bhalā naqsh banā hai koī

jab se alfaz ke jangal mein ghira hai koi

puchhta phirta hai meri bhi sada hai koi

rah ki dhul mein Duba hua aa pahunchega

apne mazi ka pata lene gaya hai koi

raat ke sae mein ek ujDe hue aangan mein

be-sada ThunTH ke manind khaDa hai koi

jab bhi ghabra ke tujhe deta hun ek aadh sada

log kahte hain ki is ghar mein bala hai koi

main wo chiTThi hun miTa jata hai jis ka har harf

paDh ke ek bar mujhe bhul gaya hai koi

aasman raat daraKHton ke qarib aaya tha

puchhta phirta tha kya un mein chhupa hai koi

tum yunhi waqt ganwane pe tule ho 'abid'

kabhi pani pe bhala naqsh bana hai koi