jab se bana liya tujhe parwardigar yar

jab se banā liyā tujhe parvardigār yaar

aatī hai har taraf se sadā yaar yaar yaar

ye hijr ye firāq haiñ qisse kahāniyāñ

jaane kahāñ ga.e haiñ sabhī duur paar yaar

tū ham ko chhoḌ-chhāḌ ke arshoñ pe jā basā

ham ab bhī kar rahe haiñ tirā intizār yaar

vo husn-e-be-misāl nazar aa gayā mujhe

dekhā basāratoñ se pare baar baar yaar

vo dhaḌkanoñ kī oT meñ kartā hai guftugū

mujh meñ basā huā hai mire ār-pār yaar

dāman ko taar kar ke koī qais ho gayā

merī taraf bhī dekh badan tār-tār yaar

jo ahlyān-e-ishq the jaane kidhar ga.e

ab to bache haiñ jhuuT ke qaul-o-qarār yaar

ai yaar dekh sūrateñ vīrān ho ga.iiñ

marne pe aa ga.e haiñ tire sogvār yaar

yārān-e-dardmand ne ḳhushiyoñ kī dī sadā

dekhā gayā na un se koī ashk-bār yaar

'e.ajāz' vo judā to huā thā gayā nahīñ

maiñ roz mar rahā huuñ magar qist-vār yaar

jab se bana liya tujhe parwardigar yar

aati hai har taraf se sada yar yar yar

ye hijr ye firaq hain qisse kahaniyan

jaane kahan gae hain sabhi dur par yar

tu hum ko chhoD-chhaD ke arshon pe ja basa

hum ab bhi kar rahe hain tera intizar yar

wo husn-e-be-misal nazar aa gaya mujhe

dekha basaraton se pare bar bar yar

wo dhaDkanon ki oT mein karta hai guftugu

mujh mein basa hua hai mere aar-par yar

daman ko tar kar ke koi qais ho gaya

meri taraf bhi dekh badan tar-tar yar

jo ahlyan-e-ishq the jaane kidhar gae

ab to bache hain jhuT ke qaul-o-qarar yar

ai yar dekh suraten viran ho gain

marne pe aa gae hain tere sogwar yar

yaran-e-dardmand ne KHushiyon ki di sada

dekha gaya na un se koi ashk-bar yar

'eajaz' wo juda to hua tha gaya nahin

main roz mar raha hun magar qist-war yar