jab se dil mein sama gaya koi

jab se dil meñ samā gayā koī

ek halchal machā gayā koī

rog jī ko lagā gayā koī

merī hastī miTā gayā koī

khoyā khoyā udaas rahtā huuñ

toḌ kar dil chalā gayā koī

phir koī choT lag ga.ī dil par

yak-ba-yak yaad aa gayā koī

ek bijlī sī gir paḌī dil par

jab kabhī muskurā gayā koī

ab ye ashkoñ se bujh nahīñ saktī

aag aisī lagā gayā koī

be-sabab is jahāñ meñ jiine kī

de ke mujh ko duā gayā koī

ishq ko jaan kar baḌī ne.amat

ishq mujh se jatā gayā koī

raat bhar jāgne kī ulfat meñ

de ke mujh ko sazā gayā koī

maiñ use be-vafā nahīñ kahtā

ruuTh kar gar chalā gayā koī

de ke ḳhushiyāñ tamām aalam ko

ġham kā rutba baḌhā gayā koī

dars jiine kā ik nayā 'rāmish'

jaate jaate sikhā gayā koī

jab se dil mein sama gaya koi

ek halchal macha gaya koi

rog ji ko laga gaya koi

meri hasti miTa gaya koi

khoya khoya udas rahta hun

toD kar dil chala gaya koi

phir koi choT lag gai dil par

yak-ba-yak yaad aa gaya koi

ek bijli si gir paDi dil par

jab kabhi muskura gaya koi

ab ye ashkon se bujh nahin sakti

aag aisi laga gaya koi

be-sabab is jahan mein jine ki

de ke mujh ko dua gaya koi

ishq ko jaan kar baDi neamat

ishq mujh se jata gaya koi

raat bhar jagne ki ulfat mein

de ke mujh ko saza gaya koi

main use be-wafa nahin kahta

ruTh kar gar chala gaya koi

de ke KHushiyan tamam aalam ko

gham ka rutba baDha gaya koi

dars jine ka ek naya 'ramish'

jate jate sikha gaya koi