jab se hayat KHugar-e-alam ho gai

jab se hayāt ḳhūgar-e-ālām ho ga.ī

dāman-kashīdgī kī fazā aam ho ga.ī

nikle the vaqt-e-sub.h baḌī ehtiyāt se

do hī qadam chale the ki phir shaam ho ga.ī

aaya huuñ shāhrāh-e-haqīqat se lauT kar

marne kī aarzū thī jo nākām ho ga.ī

dekhe haiñ ham ne aise haqīqat-pasand log

jin kī ki zehniyat bhī siyah-fām ho ga.ī

iz.hār-e-ehtijāj pe ye kaalī paTTiyāñ

taskīn-e-zauq-e-ḳhidmat-e-islām ho ga.ī

is ahd-e-intishār meñ pahchāniye kise

tashḳhīs-e-shahriyat bhī to nīlām ho ga.ī

'hāmid' mazāq-e-dīd na hone ke bāvajūd

chashm-e-pur-iztirāb lab-e-bām ho ga.ī

jab se hayat KHugar-e-alam ho gai

daman-kashidgi ki faza aam ho gai

nikle the waqt-e-subh baDi ehtiyat se

do hi qadam chale the ki phir sham ho gai

aaya hun shahrah-e-haqiqat se lauT kar

marne ki aarzu thi jo nakaam ho gai

dekhe hain hum ne aise haqiqat-pasand log

jin ki ki zehniyat bhi siyah-fam ho gai

izhaar-e-ehtijaj pe ye kali paTTiyan

taskin-e-zauq-e-KHidmat-e-islam ho gai

is ahd-e-intishaar mein pahchaniye kise

tashKHis-e-shahriyat bhi to nilam ho gai

'hamid' mazaq-e-did na hone ke bawajud

chashm-e-pur-iztirab lab-e-baam ho gai