jab se jaana hai ki duniya mein wafa koi nahin

jab se jaanā hai ki duniyā meñ vafā koī nahīñ

phir kisī se bhī rahā ham ko gila koī nahīñ

har taraf jhuuT hai dhokā hai be-īmānī hai

aur iḳhlās-o-mohabbat kā sila koī nahīñ

har zabāñ par gile shikve to bahut haiñ lekin

harf-e-tahsīn nahīñ lafz-e-duā koī nahīñ

ajnabī ho ga.e vo log jo apne the kabhī

ham se az-rāh-e-muravvat bhī milā koī nahīñ

merī ḳhushiyoñ meñ mire saath zamāna thā magar

mushkileñ aa.iiñ to phir saath chalā koī nahīñ

haq-parastī ke bahut da.ave kiye sab ne magar

rāsta chhoḌ ke bātil kā gayā koī nahīñ

sunte haiñ pahle zamāne meñ bure log the kam

ab to lagtā hai ki duniyā meñ bhalā koī nahīñ

zindagī biit ga.ī saarī magar apne liye

ham ko lamha kabhī fursat kā milā koī nahīñ

ishq ke dasht se guzre to ye mālūm huā

raah pur-ḳhār nahīñ hai to mazā koī nahīñ

vo jo kahte the mire bin nahīñ jī pā.eñge

saare zinda haiñ abhī tak to marā koī nahīñ

muztarib dil hai agar terā to sochā hai kabhī

kaise pā.egā sukūñ is meñ ḳhudā koī nahīñ

jab mohabbat nahīñ duniyā se to shikva kaisā

tere dil meñ to lagan us kī 'sabā' koī nahīñ

jab se jaana hai ki duniya mein wafa koi nahin

phir kisi se bhi raha hum ko gila koi nahin

har taraf jhuT hai dhoka hai be-imani hai

aur iKHlas-o-mohabbat ka sila koi nahin

har zaban par gile shikwe to bahut hain lekin

harf-e-tahsin nahin lafz-e-dua koi nahin

ajnabi ho gae wo log jo apne the kabhi

hum se az-rah-e-murawwat bhi mila koi nahin

meri KHushiyon mein mere sath zamana tha magar

mushkilen aain to phir sath chala koi nahin

haq-parasti ke bahut dawe kiye sab ne magar

rasta chhoD ke baatil ka gaya koi nahin

sunte hain pahle zamane mein bure log the kam

ab to lagta hai ki duniya mein bhala koi nahin

zindagi bit gai sari magar apne liye

hum ko lamha kabhi fursat ka mila koi nahin

ishq ke dasht se guzre to ye malum hua

rah pur-KHar nahin hai to maza koi nahin

wo jo kahte the mere bin nahin ji paenge

sare zinda hain abhi tak to mara koi nahin

muztarib dil hai agar tera to socha hai kabhi

kaise paega sukun is mein KHuda koi nahin

jab mohabbat nahin duniya se to shikwa kaisa

tere dil mein to lagan us ki 'saba' koi nahin