jab se mili hai aane ki unki KHabar mujhe

jab se milī hai aane kī un kī ḳhabar mujhe

lagne lage haiñ achchhe ye dīvār-o-dar mujhe

nafrat kī zad pe aa.e haiñ hālāt is tarah

apnā nahīñ hai lagtā ḳhud apnā hī ghar mujhe

ye bhī sitam-zarīfī-e-taqdīr dekhiye

pahchāntī nahīñ hai koī rahguzar mujhe

ab bhuul kar bhī mujh ko vo kartā nahīñ hai yaad

chāhā thā jis ne dekho kabhī Tuut kar mujhe

dahshat samā ga.ī hai fazāoñ meñ is tarah

lagne lagā hai apne hī saa.e se Dar mujhe

saa.e kī thī talāsh kahāñ aa gayā huuñ maiñ

milte haiñ aaj raah meñ sūkhe shajar mujhe

shāyad ki mere she'roñ meñ kuchh baat hai 'kashish'

pahchānñe lage haiñ ab ahl-e-nazar mujhe

jab se mili hai aane ki un ki KHabar mujhe

lagne lage hain achchhe ye diwar-o-dar mujhe

nafrat ki zad pe aae hain haalat is tarah

apna nahin hai lagta KHud apna hi ghar mujhe

ye bhi sitam-zarifi-e-taqdir dekhiye

pahchanti nahin hai koi rahguzar mujhe

ab bhul kar bhi mujh ko wo karta nahin hai yaad

chaha tha jis ne dekho kabhi Tut kar mujhe

dahshat sama gai hai fazaon mein is tarah

lagne laga hai apne hi sae se Dar mujhe

sae ki thi talash kahan aa gaya hun main

milte hain aaj rah mein sukhe shajar mujhe

shayad ki mere she'ron mein kuchh baat hai 'kashish'

pahchanne lage hain ab ahl-e-nazar mujhe