jab se tumne de diya hai dil ka nazrana mujhe

jab se tum ne de diyā hai dil kā nazrāna mujhe

kah rahī hai saarī duniyā terā dīvāna mujhe

dosto roko na mujh ko aa rahā huuñ vajd meñ

yaad ik muddat pe aaya hai sanam-ḳhāna mujhe

raah taktā hogā koī merā manzil ke qarīb

shab kī tārīkī meñ ai dil raah dikhlānā mujhe

aao tanhā.ī meñ chal kar dil kī kuchh bāteñ kareñ

shahr meñ mumkin nahīñ mil jaa.e farzāna mujhe

hosh kī bāteñ karūñ kyā hosh baaqī hai kahāñ

jab se tum ne kar diyā hai apnā dīvāna mujhe

shaiḳh jī chalte bane haiñ le ke ahd-e-tark-e-mai

raat bhar kosā kareñge jām-o-paimāna mujhe

jī meñ aatā hai 'zafar' maiñ phir chaman ko chhoḌ duuñ

raas aatā hai hamesha se hī vīrāna mujhe

jab se tum ne de diya hai dil ka nazrana mujhe

kah rahi hai sari duniya tera diwana mujhe

dosto roko na mujh ko aa raha hun wajd mein

yaad ek muddat pe aaya hai sanam-KHana mujhe

rah takta hoga koi mera manzil ke qarib

shab ki tariki mein ai dil rah dikhlana mujhe

aao tanhai mein chal kar dil ki kuchh baaten karen

shahr mein mumkin nahin mil jae farzana mujhe

hosh ki baaten karun kya hosh baqi hai kahan

jab se tum ne kar diya hai apna diwana mujhe

shaiKH ji chalte bane hain le ke ahd-e-tark-e-mai

raat bhar kosa karenge jam-o-paimana mujhe

ji mein aata hai 'zafar' main phir chaman ko chhoD dun

ras aata hai hamesha se hi virana mujhe