jab se ummid bandhi patthar par

jab se ummīd bāñdhī patthar par

dhuul sī jam ga.ī muqaddar par

kis ne chādar dhueñ kī taanī hai

mere jannat-misāl manzar par

mere chāragaroñ ne rakkhā hai

ek ik rāste ko Thokar par

āsmāñ kī talab meñ kaT kar bhī

phaḌ.phaḌāte rahe barābar par

paas tīr-o-kamāñ ke hote hue

ḳhauf taarī hai mere lashkar par

jab ghaḌī imtihān kī aa.ī

maiñ ne rakh dī zabāñ aḳhgar par

qaid kamre meñ ho gayā huuñ 'nabīl'

pheñk kar maiñ galī se bāhar par

jab se ummid bandhi patthar par

dhul si jam gai muqaddar par

kis ne chadar dhuen ki tani hai

mere jannat-misal manzar par

mere chaaragaron ne rakkha hai

ek ek raste ko Thokar par

aasman ki talab mein kaT kar bhi

phaDphaDate rahe barabar par

pas tir-o-kaman ke hote hue

KHauf tari hai mere lashkar par

jab ghaDi imtihan ki aai

main ne rakh di zaban aKHgar par

qaid kamre mein ho gaya hun 'nabil'

phenk kar main gali se bahar par