jab se ye ijtinab hai pyare

jab se ye ijtināb hai pyāre

dil ko aur iztirāb hai pyāre

ab jo terā itaab hai pyāre

zindagī kāmyāb hai pyāre

yuuñ taġhāful-shi.ār ban jaanā

kyā vafā kā javāb hai pyāre

haañ tirā is meñ kuchh qusūr nahīñ

merī qismat ḳharāb hai pyāre

aa ki tere baġhair ab merī

zindagānī azaab hai pyāre

maiñ sarāpā nigāh-e-shauq huuñ aur

tū mujassam shabāb hai pyāre

tujh se milne bhī to nahīñ detā

ye zamāna ḳharāb hai pyāre

ishq bhī be-nazīr hai vallāh

husn gar lā-javāb hai pyāre

jo na parde meñ bhī tujhe chhoḌe

vo nazar kāmyāb hai pyāre

jis pe terī nazar ho vo zarra

rashk-e-sad-āftāb hai pyāre

apne 'tal.at' kī qadr jaan ki vo

terā ḳhāna-ḳharāb hai pyāre

jab se ye ijtinab hai pyare

dil ko aur iztirab hai pyare

ab jo tera itab hai pyare

zindagi kaamyab hai pyare

yun taghaful-shiar ban jaana

kya wafa ka jawab hai pyare

han tera is mein kuchh qusur nahin

meri qismat KHarab hai pyare

aa ki tere baghair ab meri

zindagani azab hai pyare

main sarapa nigah-e-shauq hun aur

tu mujassam shabab hai pyare

tujh se milne bhi to nahin deta

ye zamana KHarab hai pyare

ishq bhi be-nazir hai wallah

husn gar la-jawab hai pyare

jo na parde mein bhi tujhe chhoDe

wo nazar kaamyab hai pyare

jis pe teri nazar ho wo zarra

rashk-e-sad-aftab hai pyare

apne 'talat' ki qadr jaan ki wo

tera KHana-KHarab hai pyare