jab sham-Dhale hijr tera mujhse mila tha

jab shām-Dhale hijr tirā mujh se milā thā

maiñ ashkoñ ke jalte hue ḳhemoñ meñ khaḌā thā

in.ām-zada chehroñ pe ḳhiffat thī ḳhushī kī

darbār meñ ik tan se judā sar bhī paḌā thā

ye dariyā tire saath mujhe le hī chale the

sad-shukr samundar ne mujhe thaam liyā thā

maiñ ḳhālī tahī-dāmāñ mazāfāt kā baasī

gaañv ke muqaddar se tirā shahr baḌā thā

āyāt ko nezoñ pe chaḌhā kar to na pūchho

zanjīr-zanī karte hue shahr meñ kyā thā

jo aaj mire darpa.e-āzār huā hai

ye ġham to mire ḳhuun ke TukḌoñ pe palā thā

us shaḳhs ko āzādī mirī maar na Daale

jo rauzan-e-zindāñ se mujhe jhāñk rahā thā

jab sham-Dhale hijr tera mujh se mila tha

main ashkon ke jalte hue KHemon mein khaDa tha

inam-zada chehron pe KHiffat thi KHushi ki

darbar mein ek tan se juda sar bhi paDa tha

ye dariya tere sath mujhe le hi chale the

sad-shukr samundar ne mujhe tham liya tha

main KHali tahi-daman mazafat ka basi

ganw ke muqaddar se tera shahr baDa tha

aayat ko nezon pe chaDha kar to na puchho

zanjir-zani karte hue shahr mein kya tha

jo aaj mere darpae-azar hua hai

ye gham to mere KHun ke TukDon pe pala tha

us shaKHs ko aazadi meri mar na Dale

jo rauzan-e-zindan se mujhe jhank raha tha